الساعة كام ..//للشاعر والأديب الاعلامي الدكتور .محمد ضباشه محرر الموسوعة الحديثة للشعراء والادباء العرب//مصر

الساعة كام !؟
محمد ضباشه

إزاى تمام !؟
وفى المنام .. أو لو يجوز
حالة وعايمة فى الضلام
ترشق سهام تِعْمِى الأنام
من قهرها الناس نيام
خايفة لتصرخ فى الفضا
وتقول حرام
يا شلة العصر الذي
بَنَى مقامه بالكلام
شَدّ الفرامل ما انتبه
ان اللى راكب ع الهوى
من غير حِزَام
يعنى كقشة فى وزنها
من نفختين يطير قوام
يملى الشوارع والميدان
يحفر على حيطان الزمان
من كان شيطان
أو حتى طاير فى السما
قبل الأوان
انهي الكلام
أو فصله للناس تشوف
كل الوشوش المغرمه
تملى الكروش
أو نور يبان
يظهر عيوب كل السكك
اللى انهرت فوق الدكك
تعجن مرارة صبرها
وتأكله سهل لحيتان
راكبين على كل الحتت
قافلين منافذ شمسها
عن يوم جعان
فاعل ومرفوع باللغة
بيجر هين
بينصبوه ويحلفوه بالمصطفى
ليقولى فين
ألقى نصيبي واعرفه
عدل وميزان
ضاعت سنين واتبخرت
واتمخطرت يوم عرسها
على اللى باعو لنا الهوى
من غير مكان
ف ازاى أقول كله تمام
الحالة فل وريش نعام
والناس ترفرف م السعادة
وتبقى عادة عندنا
وبنسألوك أمتى وفين
والساعة كام ؟

من ديوان رسالة بعلم الوصول 2055