تحت الكباري
محمد ضباشه
تحت الكباري حَمَّام مالقاش وطن فيكي
مدبوح على الأرصفة يتمنى يلاقيكي
جايبة عيون التقي تنظر لحال حاله
وترجعه دنيتك يفرح لقاه بيكي
هَجَر حيطان في مكان خارج حدود الشوف
لا شاف فى يوم القمر نور طريقه يشوف
منين يجيب لقمته ما يبات قتيل الخوف
فيكون مصيره الضياع فيكي وبإديكي
سَتْر البيوت إنكشف ما عاد مكفى عيال
وابو العيال اتنحل عمره بضيق الحال
وحكومة عايشه ف خيال بطال ما بيراعي
يفتح بيوت الغلابة فينوروا عنيكي
تشوفى مين السبب اللي رماهم تحت
ولا بطون الجشع النازلة فيهم فحت
ولا لأمتى الهوى يكتب عليهم قحت
أموات وفيهم نفس لفظاه أراضيكي
دى ناس لا عايزة شالية ولا طموحها ف قصر
أو حتى صوتهم عِلِى ع اللى سقاهم فشر
دُولْ حتة منك وداس على ربيعها العصر
طحن ضلوعهم وما قادرين ينادوكي
قومى احضنيهم وطن ويا ابتسامة حب
كونى كمن أنقذوا يوسف حياة م الجب
يمكن يكون لك ولد فيهم أمين ويشب
يملى خزاينك دهب وتدور سواقيكي
