ذكريات يناير الحزين
أيمن البكرى
فى البدايه تحيا مصر
مهما كان ومهما كنت
فى أي وقت وأي عصر
لما تسمع إسمها
إضرب تعظيم سلام وأقف إنتباه
مصر دى طول عمرها مقبره للغزاه
والسلام والامان والارهاب والهباب
خلاص حفظنا كل داه
ومتقوليش ثورة يناير
شباب كان غضبان وثاير
والحريه والفساد والضماير
كانت فى البدايه ثوره
واتحولت عقد بيع لدوله
واتقسمت على العتاوله
وكل واحد خدله جوله
جوه مشهد فى الميدان
وكل واحد كان ليه مكان
كنا فى الشارع
بس كنا حاسين ب الامان
وكل واحد فينا بيحلم ببكره
وكان فينا ناس عاديه
وناس ماتت مفضلش منهم
أى ذكرى
وإل عايش لحد دلوقت
لما بيفتكر كل داه بيقول أه
أد إيه إحنا كنا ناس غبيه
ولما تعدى على الميدان
تفتكر ….الذكريات
هنا هتفنا يسقط النظام
وهنا واحد صاحبى مات
وهنا وقعت
وإتبعترت منى كل الحاجات
وهنا بنت كانت بتدور على خطيبها
إل فجأه إختفى
وكان الجو برد جداً
والشمس طلعت حسينا ب الدفا
هنا تسمع هتافات
وهنا شتايم وسباب
والمخبريين متنتورين
فى كل حته زي الضباب
المشهد كبير والحكايات كتير
وتعدى سنين ويمر الزمان
وفجأة بعد ١٣ سنه تصحي
تلاقى نفسك على السرير
ولما تفوق تقول ياريت إل جري ما كان
