رمضان زمان
بيتنا في رمضان واحنا كنا صغيرين….. مع ذكريات الزمن الجميل
بين الأهل والاحباب والناس الطيبين
اللى رحلوا وما زالو
جوا القلب عايشين
كانت العيشه بسيطة وعلى قد الإيد وبركة رب العالمين وبرضا الوالدين كان القليل يزيد ويكفي ويفيض
كان كل الأيام حلوة
ونعيش كل يوم فى عيد
كان الناس عايشه بقلب صافي ومسامح كانوا عارفين
يعني إيه إكرام الضيف واجب
ويعني ايه كلمة الجار للجار ويعني ايه حُسْن معاملتك لليتيم
والصديق وقت الضيق
ويعني ايه أهلك لا تهلك
لا كان فيه كرونا
ولا وباء خد بالك
دلوقتي يا إنسان
مين بيسأل على مين
كلنا عيشين متفرقين
وفي زحمة الدنيا تايهين
بقينا في زمن ألنت والواي فاي
البعيد قريب والقريب بعيد
قرَّبنا ننسى وشوش أهالينا
ما تلموني وسامحوني يا قُرَّاء
انا عارفه أن الدنيا لسه فيها خير وفيه ناس طيبين
لكن غصب عني
خدني الشوق والحنين
لذكريات الزمن الجميل
وكل سنة وانتم طيبين
رمضان كريم
بقلمي…فاطمة محمد محمود
