………. ست الطيبين……
بتمر السنين
وانتي برضه
ست ست الطيبين
لسه صورتك
زى ماهي
بابتسامتك
بالدفا ويا الحنين
لسه برضه النور
بيرسم في الخطاوي
الحيرانين
لسه صوتك رنته
بتهز قلب المشتقاين
لسه يامه قلبي
حاسس انها
حبة دقايق
مش سنين
فاكره يامه
لما كنتي بتفردي
طشط العجين
والا لما بتنخلي
حبة طحين
فاكره يامه
لما كان النقشبندي
يقول موشح
للأمين
لما كان رفعت بيرتل
في الايات
ونقول امين
فاكره يامه في الشتا
والسقف ينقع
واحنا كنا نعسانين
كنتي يامه بتفرشي
كل الحلل
شمال يمين
النهارده سقف دارنا
معدش بينقع
بس برضه صقعانين
الدفا مش في الحيطان
الدفا في قلوب
تحبك
حتى لو كانت بطين
ايوه يامه ليكي وحشه
ليكي شوق جوانا
يامه كل لحظه
فرق ياما كبير
مابين الطيبه والناس
اللي جاحده
كنتي ساقيه بتملا
يامه الغيط خضار
كنتي رغم القسوه
والذل انتصار
كات ملامحك كلها
أجمل نهار
كنا نرمي في حزننا
دايما في حجرك
نلقى سقف وبيت ودار
كنا نتعب من حياتنا
نلقى جنه فاتحه بابها
نترمي فيها في اذار
كنتي حلم في عز عتمه
لما فوقنا
لقينا روحنا بتتشوي
وبالف نار……………………..
اشرف الشناوي
شاعر عاميه
البرامون
المنصوره
