………سكه وطريق………
مفيش احلى
من الضحكه
تكون م القلب
تهز الروح وتغسلها
م الشقا والغلب
تغير كل اوصافك
وترسم وش غير وشك
وتفرش بالامل سكه
وتبدر نور
مفيش احلى
من الضحكه
تعدى بها غيطان وبحور
وتلقى الدنيا غنيوه
فى عين عصفور
تهد الضلمه وتكسر
حيطان السور
تشد الحلم م الجنه
وترمى فى قلبك الحنه
وتبنى قصور
مفيش احلى
من الضحكه وطن
وزهور
تصحى قلبك الميت
يدق ويرجعك تانى
وتمشى السكه عميانى
تحس بنشوه وبفرحه
وتزرع أرضك المالحه
وتبنى جسور
يضيع حزنك
ويتسرسب
يخاف م النور
وترجع تانى ولحلمك
مفيش احلى من الضحكه
لروح مكسور …………..
اشرف الشناوى
شاعر عاميه
المنصوره
البرامون
