قصيدة………علبة ألوان
……….. أيمن البكري………
الابيض صعب تلاقيه
إوعي تتخدع فيه
هتقابله من بره يبان
مخلص وامين إنسان
لاكن من جوه جبان
سواد وحقد ماليه
ولو دققت ف وشه
كله باين ف عنيه
الاصفر لونه مخطوف
شايل الهم علي إكتافه
ولا عمر الحظ ف يوم شافه
الدنيا جايه عليه
ودموعه ماليه عنيه
غلب الغلب ف أوصافه
البني داه لون عربية سعادة البيه
راجع أخر اليل بعد سهره ف الكباريه
بيبحتر فلوسه شمال ويمين
علي البنات والكيف
وتشوفه تقول نضيف وشريف
يبان من بره إنه نضيف
لاكن من جوه سفيه وسفيق
الازرق لون السما بيبان
كأنه أجمل الالوان
ف ساعة الفجر وقبل طلوع الشمس
وصوت العصافير يهمسلي ف وداني
وبنت جميله غرقانه ف احضاني
وقلب حنين بيطبطب
وإيد لمستها بترطب
وأصحي علي ضي الشمس
داه كان حلم لاكن الواقع أصعب
الاسود لون الاحزان
بنشوف فيه ألامنا وأوجاعنا
الناس إل كانت معانا زمان
راحت وفارقت الدنيا
وسابت جوانا خوف
وعيون مش قادره تشوف
ودنيا عماله تتغير
مبقاش فيها اي امان
الاحمر لون علي شفايفها
تصدق ما كنتش عارفها
بجد إتغيرتي كتير
وباين عليكي العز
وكأنك رجعتي سنين
وحاسس عنيكي بتقولي
شوف دلوقت وصلت لفين
افتكرت شفايفك دي
كام مره لمستها ب إديا
وكام مره سرحت عنيكي ف عنيا
وكام مره بكيتي حضني
وقولتيلي إحلف وإوعدني
عمرك يوم ما هتسبني
وف الاخر إل سابتني إنت,
وبعد سنيين مقابلاني
عامله نفسها مش شايفاني
