كل شي ما افهمت ..بالشعبي
نص قرن مرَّن
و فوكَاها عشر اسنين
من چنت طفل
تعلمت من امي الحنين
اسنين العمر
تسابكَن و كبرنه
وعرفنه كيف نميز
الزين من الشين
بس ما عرفنه نميز
قَلب أليحبنه
يضحك بوجهنه
وبالظهر يغرز السكين
الدنيا مليانه قصص
وسوالفها ما تنفهم
وجاية اليوم
يالتوّچ نبَّتي
عن التجارب تسئلين
وحكـَ شيب الــ براسي
م افهمتها
وعمر يركض ركض
و اتعدت اسنيني
الستين
كل ما تكَول ذاك طيب
و اله اصل
ينكَلب ويا الزمن
ويتغير
چنه انخلق من ذهب
مو من طين
يتغيير حتى على امه
وابوه
ويتكبر
وما يعرف
ان الحياة ديّن
يا الي تسئليني
كل شي ما افهمت
دخلت من باب التواضع
و طلعت خالي الايدين
جربي تعيشي حياتچ
بس لا تتكبري
واخذي العبر
من دروس غيرچ
صدكَي لأي واحد
ما تحتاجين
حسان ألأمين
