……….. كمل اغانيك……..
أسند روحك وبكفك
لم الأوجاع من جواك
وارسم كام ضحكه
تعديك الليل
وامسك في النور
اللي معدي
هز في غربال الأحزان
عن فرحه
الدنيا ان ضحكت
تبقى مفارقه
وافرش امانيك ادامك
واعمل منها مراكب
واوعى دموعك
تخطف روحك
او تكسر فيك الامل المرسوم
الدنيا بتكسر دايما في المهزوم
حاول تطلع م القمقم وتعوم
الفجر اكيد جي
طول مالحلم في قلبك حي
واغزل م الامل الميت ضي
كمل مشوارك
كمل اغانيك
واوعى يهزك ريح
وامسح عن وشك عفر السكه
واخطف احلامك بالحته
من وسط العفاريت
وافرد في جناحك
فوق اي براح
لف في كل الملكوت
وازرع في غيطانك توت
واحلم طول مانت بتحلم
مش هاتموت ………
اشرف الشناوي
شاعر عاميه
البرامون
المنصوره
