قال الراوي ياساده ياكرام
بعد الصلاه على النبي المختار …..
حكايتنا حكاية واد مغوار
عاز يجوز ويخش دنيا
بس كان عايز المفتاح 🔑
لف ودار ما لقى مفتاح
ولما لاقاه مش عايز يفتح
يفتح كيف!
ماهو لازم يدفع 💸
ويدفع ايه؟ مش لاقي معاه
حيروح فين ده الغلبان
نفسه يشوف عياله بأمان
طب نفسه يشوف عيال وخلاص
سيبوني اقول واقول واعيد
بس انتوا تقولوا عيد ياسعيد!!!!
انا نفسي في بيت دور واحد
ويكون بجنينه كمان
او حتى بلاش بجنينه
خليني على السطح تمام
واعمل تكعيبه وشوايه
وكراسي خوص ومرايه
زي الناس الشيك اللارج
طب بلاش الرووف والتكعيبه
وبلاش شوايه وكنبايه
عايز شقه وخلاص
بعفشة ميه وبلَّاص
ومطبخ بترابيزه في النص
وغساله كمان بروحين
مش عايز مطبخ شيك
ولاحتى حوض استاليس
اقولك !!!!
انا عايز شقه وبس..
واعيش فيها ويّا حبيبتي ماهي نصي التاني وعروستي 👰♀️
وتعيش تستحمل ويّايّا ..
وتكون مقطوعه من شجرايه
مش قادر اجامل واسايس
وارجع من الشغل اتغدى…
وأأيل حبه واتمدى
وأقوم على شقة بطيخه
او حتى تلقيمة قهوه .
هو انا يااخوانا بهيس!!
طب عاوز اوضه بمنافعها
طب اوضه بحمام حتى لتسعه
انا راضي وهي راضيه
مانا نفسي اشوف فستانها
واشوفني وانا لابس البدله
هو انا يااخوانا بهيس
انا بس ظروفي صعبه وتلمه
بس انا عارف هبقى تمام
طب آخد قرض كمان!؟
هو انا خلصت الاول!!
طب اعمل ايه طيب !
ماهو ابويا سابلي فلوس
هو سماها فلوس
وصاحب البيت قال دي قروش
ماهو كان برضه موظف
يقبض في الاول وفي اخره بنشحت
كان غلبان وامي غلبانه
اتربينا كإنا يتامى
هو شغال وهي شقيانه
والجمعيات كانت شفطانا
انا قولتلكوا خلاص مشكلتي
ملامح منها وهي حكايتي
لو عايز تلاقيني لاقيني
واقف عند الناصيه بتاعتي..
اندب حظي واموت من قهري
واتصعبن على نفسي وقلة بختي ..
بعد ماضعت وضاع جوايا
صوت الراوي كمان في الزحمه
بس الراوي نداهني وقاللي
روايتك تضحّك صحيح وتبكّي..
اسمع ياابني كلام موزون
حدد هدفك تلقى نجاح
واصبر يابني هتبقى الفايز
بس حكايتك عايزه كفاح
زي بلدنا عجوزه وشابه
تعبت كبرت وهي شباب
شافت عاشت سنين ف عذاب
ولسه كمان يابلدنا لفين.
اسمع مني واوعى تلين
قوة شديده اراده حديد
حارب كسلك حطم يأسك
زود دخلك ابني حياتك
عندك كنزك هو شبابك
ابني في حلمك
اعلى واعلى بسقف طموحك
حقك حقك ايوه اكيد
قوي عزيمتك
فك سلاسل ماسكه ارادتك
حاول تعمل حاجه بإيدك
صنعه مثلا كنت غاويها
إوعى تكون غاوي كافيهات
بلدنا كريمه وحضن براح
عايزه الهمه ..شغل تمام
علمك درعك هو القوة
إسعى ياعبد وانا اسعى معاك
شوية شعر ابيض عالماشي
زحفوا ف راسك زحف خبيث
إعمل حاجه بسرعه ياسيدي
قبل مايعلنوا حرب عليك
الكام شعره هيبقوا معسكر
وانت هتبقي الباكي اكيد..
ضعف عزيمتك ، هوان إرادتك
ضيق الأفق، واليأس كمان
هما جنودهم دوول اعدائك انقذ نفسك واقسى عليهم
وبطل نقد الناس حواليك
شخصك
هدفك
هي بطاقتك…
بس خلاص طولت عليك
وصل الراوي لأخر السكه
ماهي حدوته وليها بدايه
واكيد كانت ليها نهايه
رجعت ريما كمان لعادتها
وانا رجعت لغلبي وضيقي
وغاب الراوي ف زحمة بلدي
بيحكي حكاية لواحد تاني
” مروه عبد المنعم الصماد “
