هوه مو بيدي الگلب يمكن رچيچ
گلب بين ضلوعي مو قطعة حجر
طلگت درب العشگ بيه ما مشيت
الصدفه لعبت دور جاباك القدر
خاف اچذب يوم إذا گتلك نسيت
بگلبي مد الشوگ ما مره جزر
بيدي شايل روحي من شفتك سهيت
شرع أبوابه الگلب شال الحظر
وچني ما شايف عشگ توني ابتديت
وروحي بيها لهسه من نارك جمر
آه يذنبي العاشگه وكلش چبير
وربي گال المؤمن ايغض البصر
كفرتني وطلع إيماني قليل
وانلدغ كل يوم من نفس الجحر
غدت بلساني زجل كل الحروف
وبضمير الشوگ ما ظل مستتر
يا اصيل امروض بطوله وحديد
اكحيل گبلك ما شفت طالع شمر
انطي نحري شما غلا لحد السيوف
بس مقابلها شرط شمة نحر
امطيش براسي سحر طرف اللحاظ
يامن اسرارك مثل عينك بحر
خل يسورونك هلك سور أعلى سور
ولافتات اتحيط كل جانب خطر
ب بيتك اگعد رحمه لهلك من اصوم
انطيني عطوة شوگ بس هذا الشهر
وانت تدري بحضرتك صومي حرام
ﻻن وجهك عيد يهﻻل الفطر
..
بقلمي .. حسن ابو ناصر
