)قطر الصعيد(
ياابن ابويا شد حيلك
ع المصايب متعودين
قولي مين باقيلي غيرك
بعد رب العالمين
إجمد ياواد وشد حيلك
من صغرنا متيتمين
لسه فاكر أبوك يجيلك
مات خلاص من يومين
تم نهارك زي ليلك
ياخويا ربك وحده معين
وتم بختك من دون جيلك
مكتوب عليك م الشقيانين
+++++
أسكتي يابنت أبويا
مش مزعلني النصيب
ولا عشان ما احنا غلابه
يموت أبويا فوق القضيب
والله ياقطر أمرك عجيب
زرع إتحصد قبل الأوان
كان لسه بدري عليه يطيب
قطر الغلابه الشقيانين
قطر الصويت
قطر النحيب
قطر الصعيد
أبويا لسه كان معايا
كان مسافر يجيب عشايا
قطع القلب وحشايا
لما مات بين القطار والقضيب
لسه من ساعه مواعدني
باس خدودي ومعاهدني
نلبس فى العيد الجديد
لسه متواعد مع أمي
يبعتلها شوال الدقيق
أعمل أيه من غير أبويا
وإحنا لسه صغيرين
دم أبويا دم أخويا
دم جاري دم أهلي عند مين
++++++
إصبر ياخويا ياابن ابويا
دمهم فى رقابي ناس متعلقين
صعبان عليا طول عمرنا
فى حبل الشقا مشعلقين
كاااااام أب مات
كاااااام م الولاد لحنان أبوهم محتاجين
عشقوا الصباح
وعيتم ليلهم ليل طويل
والأنيس هو البكا هو العويل
ياأبن أبويا الحمل صار حمل تقيل
وكل إللي نقدر نعمله
حسبنا الله ونعم الوكيل
بقلمي
نبيل عبد الحليم
٢٧/٣/٢٠٢١
