تعالي يابت احبك واتغزل فيك بالعاميه
وسيبك من الفصحي وكلام الاونطجيه
روحي البسي عبايه سمرا والطرحه
وهاتيلي معاك الشبشب واحلي جلابيه
ونروح سيما بالاس ونشوف افلام هنديه
عارفك بتحبي الغم وطالعه لأمك نكديه
نتفرج علي فيلم حلو للمعلم شاروخان
والواد الاؤوزعه اللي قصته .. محنيه
وبعدين نروح لجاد ناكل فول وطعميه
واخدك المالكي نضرب طبقين مهلبيه
واجيبلي سجاير اجنبي لزوم العنطزيه
واجيبلك غزل بنات وحلاوه شعر طحنيه
اوعي تقولي كفايه صرف جتك بلاوي
يابت لما اعشق تلاقيني فييس وغاوي
بس تعطشي مش هسقيك م الكولدير
وهو في احلي من ميه القلل القناوي
يابت اوعي تقولي لي حكم وفتاوي
عمري مابص لواحده شقرا ولا ناوي
بيفكروني بالدهنه اللي عند الجزار
لكن انت ياسمرا طاجن فته بالعكاوي
تعالي بقي اروحك كفاك صرمحه ولف
ابوك يزعل مني ويابخت من زار وخف
يابت بطلي تزغزغزيني من تحت باطي
احسن والختمه الشريفه ارزعك بالكف
