من إبداعات العظماء
المستشار / عبد الرسول كريم يكتب :
( زين وجواهر)
( الجزء الأول)
زين
ليلك ونهارك بين الخبيز والبهايم
ولا عارفه ان كنت صاحي ولا نايم
والجسم مهدود م الفطار للسحور
ميكنش مسحور فاطر زي صايم
جواهر
يا راجل اعترف دا الزمن عليك جار
متلقح طول النهار تحت حيط الجار
ياجي عليك الليل وتقول انا الاسد
د عضمك فسد وبقيت دخان بلا نار
زين
حرام عليكي دايما للجميل ناكره
كنتي زي القلم بالطبع مش فاكره
اكلتي لحمي وبقيتي زي التليس
دا انتي ابليس لا حامده ولا شاكره
جواهر
عجناك وخبزاك وعارفه صنفك واطي
ولجل غرضك بتبوس القدم وتطاطي
نسيت شبكتك ليا؟ كانت طاجن وزير
وعملي فيها وزير سبحانك يا عاطي
زين
ماشي ياست ابوكي اصل انا الغلطان
بيت ابوكي عشه ملهش حتي حيطان
ولا يوم ابوكي زارك ومعاه كيس البلح
ولو حاله انصلح يتحزم بدون قفطان
جواهر
قالوا ف الامثال آخر خدمة الغز علقه
جوازي منك غلطه ياخي غور بلا فلقه
أكلت لحمي ني وكرامتي بيك اتهانت
اهو هانت باقي خلاص طلقه
زين
يعدي شهر الصيام واشوف معاكي حل
كفايه قلبي اتوجع ومعاه اللسان اتشل
جريمتي الجواز منك امتى انول العفو
واعيش حياة الصفو من غير مرار الخل
جواهر
دا عيدي عيدين يوم الخلاص منك
اكسر وراك الزير ولا ارعي معاه سنك
نادره عليا يمين لارقص في ليلة زار
ع الطبله والمزمار واسلط عليك جنك
جواهر
شهر الصيام عدي ومعاه كمان العيد
طلق بسرعه وفض بلاش تزيد و تعيد
الساعه معاك بيوم واليوم كأنه سنه
والعمر معاك اتفنا نار ف الحشا بتقيد
زين
إهدي يابت الناس حتى لعيد الضحيه
راعي حتى العيال بدل ما يبقوا ضحيه
إنسيتي يوم الفرح والرصاص ف الهوا
لمّا رقصنا سوا وسمعنا احلى تحيه
جواهر
مالك كدا نخيت وجريت معاي واطي
حقي مش هسيبه وهشتكيك للقاضي
بيقولوا في مؤخر غير المتعه والنفقه
مفيش خلاص شفقه الود كان ماضي
زين
طمعانه تاخدي الزير والشال بتاع أمي
وإتناشر جنيه نفقه وسرير مرات عمي
ولو انتي بت وصح روحي يلا إشتكي
أنا هنام وأتكي و العند أنا ف دمي
(الجزء الثاني)
( زين وجواهر ) داخل قاعة المحكمة
الحاجب نده وقال :-
محكمة.. …… جواهر أم العقل زين
و جوزها…..المدعو ابن الرجال زين
إقربوا و تعالوا واسمعوا البيه القاضي
وبلاش كلام فاضي انتوا لسه جوزين
القاضي
طلباتك يا جواهر … لا تِلفْي ولا تدوري
قولي الحقيقه….. لا تظلمي ولا تجوري
زين اللي كارهك.. ولاّ انتي مش طايقاه
وليه مضيقاه . . . ودايما عليه بتثوري
جواهر
أنا ف العز متربيه وبيتي أصيل وعـريق
وزين جار من زمان وكان لاخويا صديق
حاله يدوب ع الكد لا عنده جاه ولا مال
والقلب ليه مال إحساسنا أصلي رقيق
جواهر
عشقته يا قاضي آآه عشق النار للحطب
وجه ف ساعة القَدَر… قرا فاتحه وخطب
أنا الوحيده وافقت الكل كانوا معارضين
و بالشرع والدين….. . كتْب الكتاب اتكتب
جواهر
جهز جهازه ف يوم والدخله آخر الشهر
ولا شفت منه شبكه ولادفع حتي المهر
لملمت كل حاجاتي لا طبل فيه ولا زمر
اتاريه د بصة جمر وعاشق حياة القهر
جواهر
وف ليلة مطر ورياح و البرق فيها ورعد
زفافي كان بحماره مجروره لبيت السعد
اتاريها عشة بوص.. علي شط حتة ترعه
اخدوني ليها بسرعه لقيت القدر والوعد
جواهر
حسيت اني اتخطفت ف اول يوم زفاف
لكني عشت معاه بنت صون و عفاف
ومشفتش غير إهانه واصراره ع الخراب
ونومتي ع التراب
عيشه مرار وجفاف
جواهر
خلفت منه ولادي محمود وبعده علاء
وبعديهم يدوب بسنه خلفت بنتي ولاء
ولاكِسوه حتي ف عيد ولامشط ولا صندل
شربت خل وحنضل اكيد اختبار وبلاء
القاضي
ما كفايه يا جواهر د الدمعه مني فطّت
ع الورق كمان نازله وفوق الكلام غطّت
و القلب مني رفرف والعقل طق وطار
والله انا محتار كيف السنين عدّت
جواهر
طلبي طلاق بلا رجعه ونفقه كمان لعيالي
ومتعه مع التعويض لتعب سنين وليالي
وتمحوا ف الشهادات خانة اسم الاب
وإدعوا الإله و الرب يزول من خيالي
زين
جواهر محيط وخليج… بأطّفي فيه ناري
مهما تزيد وتعيد….. د عارها من عاري
العين معاي فارغه.. ما يملاها الا تراب
ايه ذنب الغراب…… لو عِشِق الكناري
زين
بيتي جالوس من طين وفيه زيرين فخار
كل اللّي ساكن فيه بسه و تلات تنفار
والجسم صابه المرض من الهم والتفكير
وكأني بانفخ كير وزبايني م الكفار
زين
نهاري أجير مذلول ولاقصرت ف الواجب
حتي الزيار املاها وبرضو مش عاجب
شوفلي عندك شغل إنشاالله حتي أبات
أقضيلك الطلبات وامسح جزمة الحاجب
القاضي
وبعدين فيك يا زين الدمع عندي مفيش
مملكش غير أديك كرسي جوه ونيش
خدهم وبيعهم كاش باتنين او تلات ميات
والعبره بالنيات واصبر عليها وعيش
زين
يا قاضي احكم بقلبك دا هوه حكم الزين
سيب الورق علي جنب واستر عاي الزين
بحارب ف جهلي وفقري ياقاتل يا مقتول
اوعدها بدمس الفول كل شهر ملذين
الشاهد
أنا اسمي……… صابر سعيد عبد الحق
والله العظيم أشهد .. وأقول كمان الحق
زين ضحية الزمن و ام الولاد مسكينه
ولو معاه تمن سكينه.. يشق الارض شق
القاضي
بعد الاطلاع وسمـاع الأطراف و الشهود
ودراسة عادات قوم عاد وثمود وهود
ملقناش ليها حلول حتي عند العربان
والحق هربان لنقض الذمم والعهود
القاضي
لــــذلك قررنا….. التنحي عن الـدعوي الآن
واحالتها بحالتها .. لمحكمة الحكيم لقمـان
وعلي السكرتارية :- إعلان كــافة الخصوم
والإعفاء من الرسوم ومراعاة فرق الزمان
المستشار /عبد الرسول كريم
تحريرا في16/7/2019
