نثر
ثمر الكلمة بقلم: “مرقص إقلاديوس”
ثمر الكلمة
( رسالة نثر تعبيري ايقاعية بالمحكية المصرية)
بقلم ..مرقص إقلاديوس
……
صدق من قال
إن الكلمة زى الشجر.
و زى ما الشجر
فيه شجر ضل بس
و شجر ضل و ثمر.
الكلمة برضو كدة.
فيه كلمة تريح بس
و فيه كلمة تريح
و تربح البشر.
و زى ما الشجر
احواله بتتغير بتغير الفصول.
كلمة الإنسان بتتغير كتير
طبقا لأحواله.
يقولك عاوز تعرف معدنه
طمعه أو نرفزه،
ردة الفعل على طول تبين ،
اللي جواه مخزنه.
و زي ما الشجر
جميل في النور
و في الضلمة مدٓاري.
الكلمة برضو
كل ما كان فيها صدق نية للخير.
تتقال في عز النهار.
و إن كان فيها سوء نية للشر.
تتقال في الدرا،
في وسط الليالي.
خللي كلمتك دايما
شجر ضل و ثمر.
و اطلب من ربنا
ينزل على قلبك دايما مطر.
عشان يطرح على لسانك
كلام فرح و أمل.
ملاح بحور الحكمة
مرقص إقلاديوس
