أغنية شعبية
(ماحدش سليم)
ماحدش فيها سليـــــــــم
ماحدش ميـــــه ميـــــــه
ربك هــــوه العليـــــــــــم
يامـــــا الهدوم مداريـــــه
***
لاللي معــــاه مـــــــــرتاح
ولاحتـــى اللـي مامعـهش
الكل عايــــش ســـــــواح
بيكـــــوش ولا يشبعـــش
الميه عايزهـــــــا ألــــــف
والألف عايـــــــــــزها ميه
ماحدش فيها سليـــــــــم
ماحدش ميــــــه ميــــــه
***
رزقك هـــــوه اللي جـالك
محسوب مــــع الأنــفاس
احمد ربك على حــــــالك
ولا تشكي في يوم للناس
ارضى ديما برزقـــــــــــك
هتلاقي نفسك مرضيــــه
ماحدش فيهـــــــــا سليم
ماحدش ميــــــــه ميــــه
***
للغني ماتبصش يــــــــوم
للفـــــــيـــــلا وللعـــــربيه
يمكن عايش محــــــــروم
وماشي علــــــــى الأدويه
نـِفــُسه في شـُربـة عدس
نـِفــُسه ف بصلة وطعميه
ماحدش فيها سلـــــــــيم
ماحدش ميـــــــه ميـــــه
***
خليك عزيز النفـــــــــــس
قنوع وارضى بنصيبــــك
اوعـــى تسلــــــــم لليأس
والشر في يوم يصيبــــك
وشيطــــان يوسوس ليك
وحياتك تبقــــــــــى أذيه
ماحدش فيها سليــــــــم
ماحدش ميـــــه ميـــــــه
ربك هوه العليـــــــــــــــم
ياما الهدوم مداريــــــــــه
•••
كلمات شاعــــر الإحساس
رضــاعبــدالحميـــد
