صباح العزة يا بلادى
شعر : محمد ضباشه
عضو اتحاد كتاب مصر
صباح العزة والمدفع
وجندى ع الخدود حارس
بيحرس شمسنا تطلع
تدفى القلب لو قارص
وتكتب ع التاريخ عبرة
فى أكتوبر ويوم ستة
قتلنا البطش فى جحوره
وكان ربك لنا حارس
صباح بينادى ع المدنة
تحية لروح شهيد ارضك
تحية للى قام يعبر
عشان دمه يصون عرضك
تحية للى ضحى يوم
فى شهر الصوم وهو صايم
وقال يارب إنصرنا
على الجاحد وع الظالم
وتشرق شمسنا قوة
تحش كل صوت جارس
صباح الذكرى يا مهرة
يا حبالة يا ولادة
صباح طارح لنا بكرة
غناوى حب بزيادة
صباح سارح مع طيرك
بيروى الشرق من خيرك
وجامع شمل وحدتنا
وراكب ع الحصان فارس
يهز الرمش تركع له
جبال البطش والعدوان
يجلجل صوته تسمع له
حيتان البحر والخلجان
صباح بالعقل يحسبها
ولا يغامر مع الشيطان
صباح متحنى بإيمانه
بأنه للسلام غارس
فى ذكرى انتصارات السادس من اكتوير عام 1973
