بطلت أكتب شعر
الشاعر محمد ضباشه
بطلت أكتب شعر
وأعيش كما السكران
أنفض هموم الفقر
ونهار يجينى جعان
وأركب رموش سهوكة
مع كلمتين فبركة
وأعوم على اللكلكة
يمكن يكون لى مكان
مع فرشة بالألوان
أرسم فراشة صبر
على شجرة الأحزان
هجرت عشوش الجبر
والكذب والألحان
على عود جشع طارح
ألغى بقى أمبارح
وأرميه مع النسيان
ما أنا أصلى واد عطشان
مش لاقى ولا قلة
النهر عليه غربان
والزير صبح قلة
معقول اكون إنسان
بلا شمس ولا ضلة
والناس تقول شاعر
والشعر أصله جبان
بلا مدنة ولا قرآن
عايش هواه سكران
وفى ضهره ميت سلة
ينزف من العلة
مع نجوم ضاله
مش لاقى بر أمان
ففتحت شباكها
ووقعت فى شباكها
خدنى عبير الشوق
على الرمش بالأحضان
أقطع دواوينى
وأرجع على دينى
أغزل لها الطرحة
والفرحة والفستان
وأبقى ولا عنتر
بالحرف أتغندر
وأبنى لى فى البندر
مقام بلا شطآن
يكتب قصيد فاهم
فى قلب الواقع عايم
ما يكون فى يوم خادم
ولا يخشى ليل سجان
