ما فيش حاجه
………………أيمن البكري
مافيش حاجه
لا بتتعب ولا بتتألم
ولا شايل أي هموم
ولا فوق كتافك حمول
ولا طول عمرك
واقف فى طابور
مستني يجئ عليك الدور
ولا بتشوف الغل ف أي عيون
ولا غرقان فى بحر ديون
ولا كتير من كتر الحزن
إل جواك مبتقدرش حتى تتكلم
ما فيش حاجه
هما شايفينك جماد
لا بتحس ولا ليك أي صوت
مهما تتكلم كل كلامك سكوت
بتتكلم كتير عن الهموم
والمركب إل إنت فيه غرق
شايل يعنى فوق كتافك صخور
إمشى ياد يالا غور
هنعملك إيه ما تولع ولا تتحرق
مافيش حاجه
كتير قوى بتضحك
وإنت مليان وجع
وتشوفك الناس
تقول شوفه الجدع
أد إيه مبصوت
عارف ياد لما تموت
ف أول يوم
هتلاقى صورك
على الفيس ب الكوم
إل يقول داه كان طيب
وعمره ما غلط ولا هان حد
كانت أخلاقه حلوه بجد
وإل يعملك قلب
وإل يعملك وش حزين
وإل بيقول داه حصل إمته وفين
داه كان معايا من يومين
ياخساره داه كان ف عز شبابه
وإتخطف وهو ف أحلى سنين
هيتكتب عنك
ساعتها أحلى كلام
مسمعتوش وإنت عايش
ف يوم من الأيام
ياخساره فيه ناس
طول ما إنت عايش
مش شايفه غير عيوبك
ليل ونهار فى سيرتك
ويقطعوا ف توبك
ولما تموت
وخلاص ما بقاش ليك صوت
يحسوا بقيمتك يدوبك
وإنت هناك فرحان
بتقول ياريتهم كانوا إتكلموا
عليا كمان وكمان
كلامهم عليك ب السوء
شال كتير من ذنوبك
مافيش حاجه
وعمره إل نفسه عزيزه
ما تكسروا دنيا حواجه
ولا يقبل إهانه ولا ينحنى لحد
ولايسيب الجرح جواه علامه
ولو حتى الدنيا عليه تتهد
تسأله مالك يقولك
وراسم على وشه إبتسامه
ما فيش حاجه
