كَاس وِدَايِر
ــــــــــــــــــــــــــــــــــــــــــــــ
الْمُوت نِهَايِة أَيّ حَيّ
وِأَيّ حَيّ نِهَايْتُه مُوت
كَاس وِدَايِر عَ الْخَلاَيِق
يِمْحِي فِينَا كُل صُوت
يَا اللي وَلْهَان فِيهَا هَايِم
عَ الْحُقُوق بَارِك وِعَايِم
لِسَّه بِتْعِدِّ الغَنَايِم
يَا اللي نَايِم إِصْحَى فُوق
لَو فِي بَالَك رَبّ عَالِم
كُنْت هَتْرُدِّ الْمَظَالِم
لَو فِي بَالَك يَا اللي ظَالِم
كُنْت مِن حَقَّك تُفُوت
مَهْمَا نِجْمَك كَان مِلآلِي
مَهْمَا تِسْهَر بِاللَّيَالِي
مَهْمَا كَان صُوتَك دَه عَالِي
بُكْرَه رَايِح لِلسُّكُوت
هِيَّ دِي نِهَايْةِ الْحِكَايَه
مِ البِدَايَه لِلنِّهَايَه
حِكْمَه وَاضْحَه بِنَصّ آيَه
كُل خَلْقُه رَايِح لِمُوت
الْمُوت نِهَايِة أَيّ حَيّ
وِأَيّ حَيّ نِهَايْتُه مُوت
كَاس وِدَايِر عَ الْخَلاَيِق
يِمْحِي فِينَا كُل صُوت
ــــــــــــــــــــــــــــــــــــــــــــــ
كلمات الشاعر أحمد شاهين
—– مصر — أسيوط —–
