/ ح تصـدقـى؟ /
*********
قالوا انسى اللى مش فاكراك
وايًاك تحِن , وتغتفر
وانسى كمان غرام الطين
ح تسكُن ف القمر
*
أنا ممكن اسكن غير وجودِك؟
أو ممكن ألمس غير خدودِ
وانتى رموشك ضِِل/
بيكفى البشر؟
*
لو قلت انا الطير اللى رفرف
وارتوى من كفًَ ايدِك
وان انا النبض المهاجر من
وريدك/
واللى فاكر كل يوم يغزل
ليالى الغربة ضُليلة أمل
فازاى م بينا الوصل همزه
انا كل يوم بلضُم ف حبًات
الزمن / وانده / واصيح
ازاى غرامِك غير صريح
وليه حمام الوصل/
بيخبًى الدليل
انا كل ليل تخرج مواويلى
تطبطب ع الجروح
وف كل بوح بتهجى صوتِك/
صبايا
بحِس جوًَايا بفراااااغ
وامضُغ قطوف الكلام
انا لسًه شامم ف الحزام/
ريحة هواكِ
فاكر غُناكِ الحلو طالِل
ف السما
لسًايا انا بسمع اناشيدك/
وانغامِك/ اهازيجِك
طب ايه دليلِك ان انا
نسيتك ف يوم؟
ازاى وانا الموشوم بحُبِك
ح اتلفت وانظر لغيرك
ازاى وانا عنوانى/صوتى
فيه صهيلك
انا مش ح اطوًل ف الملام
لكنًَما مستنى ضجكه مزهزه
علشان أجيلِك!!
*************
الشاعر/أحمد عفيفي
